خان ننه هایاندا قالدین بئله باشیوا دولانیم نئجه من سنی ایتیردیم!
داسنین تایین تاپیلماز سن اولن گون عمه گلدی منی گتدی آیری کنده
من اوشاق نه آنلیایدیم؟ باشیمی قاتیب اوشاقلار نئچه گون من اوردا قالدیم
قاییدیب گلنده باخدیم یئریوی یغیشدیریبلار نه اوزون و نه یئرین وار
"هانی خان ننه م "سوروشدوم دئدیلر که:خان ننه نی آپاریبلا کربلایه
که شفاسین اوردان آلسین سفری اوزون سفردیر بیر ایکی ایل چکر گلینجه
نئجه آغلارام ،یانیخلی نئچه گون ائله چیغیردیم که سسیم سینم توتولدی
او،من اولماسام یانیندا اوزی هئچ یئره گئدنمز بو سفر نولوبدی، من سیز
اوزی تک قویوب گئدیبدی؟ هامیدان آجیج ائدر کن هامییا آجیخلی باخدیم
سونرا باشلادیم که:من ده گئدیرم اونون دالینجا دئدیلر سنین کی تئزدیر
امامین مزاری اوسته اوشاغی آپارماق اولماز سن اوخا قرآنی تئز چیخ
سن اونی چیخینجا بلکه گله خان ننه سفردن تله سیک ،روانلاماقدا
اوخویوب قرآنی چیخدیم که یازام سنه: گل ایندی داها چیخمیشام قرآنی
منه سوقت آل گلنده آما هر کاغذ یازاندا آقامین گوزی دولاردی
سنده کی گلیب چیخمادین نئچه ایل بو انتظاردا گونی ،هفته ی سایاردیم
تا یاواش یاواش گوز آچدیم آنلادیم که سن اولوبسن!
بئله بیلمیه هنوزدا اوره گیمده بیر ایتیک وار گوزوم آختارار همیشه
نه یاماندی بو ایتیک لر خان ننه جانیم نولیدی سنی بیرده من تاپایدیم
او آیاقلار اوسته بیرده دوشه نیب بیر آغلایایدیم قولی حلقه سالمیش ایپ تک
او آیاغی باغلیایدیم که داها گئدنمیه ایدین
گئجه لر یاتاندا سن ده منی قوینوا آلاردین نئجه باغریوا باساردین
قولون اوسته گاه سالاردین آخی دنیانی آتارگن ایکیمیز شیرین یاتاردیق
یوخودا"لولئی" آتارکن سنی من بلشدیرردیم گئجه لی سو قیزدیراردین
اوزیوی تمییز لیه ردین گنه ده منی اوپردین هیچ منه آجیخلامازدین
ساواشان منه کیم اولسون سن منی هاوار دوراردین منی، سن آنام دوینده
قا پیب آرادان چیخاردین ائله ایستیلک او ایستک داها کیمسه ده اولورمی؟
اوره گیم دئییر که :یوق یوق او درین صفالی ایستک منیم او عزیز لیگیم تک
سنیله گئدیب توکندی خان ننه اوزون دئییردین که:سنه بهشته آلله
وئره جک نه ایستیورسن بو سوزون یادیندا قالسین
منه قولینی وئریبسن بیلیسن نه ایسترم من؟
سوزیمه درست قولاق وئر: (سن ایله اوشاخلیق عهدین)
خان ننه آمان نولیدی بیراوشاخلیقی تاپایدیم
بیرده من سنه چاتایدیم سنیلن قوجاقلاشایدیم
سنیلن بیر آغلاشایدیم یئنیدن اوشاق اولورکن قوجاغوندا بیر یاتایدیم
ائله بیر بهشت اولورسا داها من ئوز آللاهیمدان باشقا بیر شئی ایستمزدیم